اول يوم بالحضانه ١٣/٢/٢٠١١

اليوم اول يوم دراسي حق بنتي
آآه تبون الصراحه اول مره امر بهالتجربه كونها بجري
1- مانمت عدل بليل بس اتقلب
2- الصبح حسيت بدوخه مثل قبل اول يوم دوام او اول امتحان او اول شي من كل شي قعدتها و لبستها و ريقتها و صورتها مع جنطتها اللي على أمراات (اميرات) فديتها
و انطلقنا الى حضانتها (مرررسه على قولتها و يا ويله اللي يقول حضانه)
انطلقنا الى المرررسه اللي تبعد من بيتنا شارعين كونها بالفريج
نزلنا و كانت المدرسه بتخمطها و تخليني اروح :\ بس انا أبيت ذلك "قلبي مو مطاوعني"
دخلنا النشاط و حلالات التلاميذ المجكنمين عايشين حياتهم الا بنتي
لازقه فيني و منبهره بعد نص ساعه من نشاطهم قالت لي المدرسه
 (عن تجربه حتى لو تقعدين ساعه او اكثر نفس الشي ماراح توخر عنج فا نصيحه خليها )
:\\\
 بقلبي قلت اخاف تبجي جان ارد على روحي خل تبجي مردها بتطخ
قويت قلبي و انحشت الا ربع قمت اشوفها من ورا الجام الابله شايلتها و اهي تبجي
عوورني قلبي بس دست عليه لمصلحتها طلعت من الحضانه و رديت البيت و قلت حق امي عن الاحداث
قعدت شوي جان اقولها يالله ماصارت 12 و نص عشان اخذها تقوولي توج قاطتها
بما ان ماعندي دوام حاسه بفراغ رهيب و ماعندي شي يشغلني على ماتمر الساعات
و مادري اعبر عن شعوري لمنو
فقررت اني اكتب هالبوست و افتح لي مدونه افضفض فيها و اعبر عن اللي في بالي